“Verschieët nie os binnen ‘n weke ‘t schorteblauw grasgroeëne wordt.”
Kleurenblend
M’n gebur stoat olledage an z’n deure, mo de lasten tied nie. Vandeweke staakt ie ogliek were z’n kop buuten. Mor in de kop zaat er ‘n oge die an ‘t verdrienken was in ‘n plekke in appelblauwzeeëgroeën. Oeie azzo gepateeëld, rieëpe ‘k. Zie je tegen de deure gelopen dè? Neeëk joeëne, antworddet ie, ‘k zien no de feeëste van Cercle gewist ip de Mart.
Hè je dóórom j’n oge in groeënzwart geschilderd meschieën, vroege ‘k. En krieg je de verve der nie mèr of misscheën? ‘t Is da nie, antworddet ie. ‘k Gon ‘t vertallen zi. En je vertalde ‘t mien. En ik gon ‘t joender nu vertallen.
M’n gebur was dus no de Mart gegoan vo de feeëste van Cercle ‘t is ‘n fanatieke Cercletrutte. Je was deur ‘t entoeziasme én de geeëstrieken drank ‘n bitjien overmoeëdig geworden. Mo ‘k peejzen ook dat ie nie mè goeëd uut z’n ogen zaag. Ip ‘n moment komt der eeënen met ‘n sarpe roend z’n nekke, wovan da m’n gebur peejst dat ‘n blauwzwarten is. Oster ‘n klurkombienoassie is da m’n gebur nie kan uutstoan, ton is ‘t wal blauw en zwart. Van wroede kolere lopt ie no die vint en gift hem dor ‘n vuusteslag pats ip dendieënen z’n rechteroge.
Hier zi, zeej m’n gebur, os j’ ons wilt uutdagen, ton kan j’ook met ‘n blowzwart oge roendlopen. Mo verschieët nie os je binnen ‘n weke in de spegel kiekt en zieët dat da schorteblauw grasgroeëne is geworden. Dien anderen rieëp: Je zie gie kleurenblend zekere? ‘k Hèn ik gin blauwe sarpe an, ‘t is ‘n groeënen. En dorip gaaft ie m’n gebur ‘n patat were. Vlak ip z’n lienkeroge. Nè, zeejd ie, da go blauw worden zi; en os je binnen ‘n weke nuchter go zien, go je ‘t verschil wal zieën tusschen blauw en groeëne!
Fout opgemerkt of meer nieuws? Meld het hier