Brugsche Krabbels: Ol te voeëte

Siessewat Junior © GF
Redactie KW

Wat hèn Dwars door Brugge, d’ Hillig Bloeëdpersessie, de Triënale en de shuttledieënst mè kleeën ottoobuustjies mè malkoar te maken? Dan z’ olle vieëre dwèis deur Brugge zien en… te voeëte.

Wacht e ki, der klopt hier lik entwa nie. Dan z’ olle vieëre dwèis deur Brugge lieëpen, giengen, deuregoan en rieën is wo, mo die shuttle is nie te voeëte?

Dwars door Brugge is ‘n loopwedstried. In de Bloeëdpersessie liepen zeventienhoenderd fieguranten te voeëte. Os j’ ol de lokoassies van de Triënale hè bezocht, ton hè j’ ‘n ferm ende gelopen. Mo die shuttledieënst is gin bilekarre, mor ‘n ottoobuus,. En toch bliekt die shuttledieënst “te voeëte” te zien: der pakt gin mens da buustjie, ze gon te voeëte.

Vil bewegen is goeëd vo ‘t herte, de bloeëdsomloop, de loengen, de derms… en vorol vo den BMI. In geweune menschentoale, goeëd vo te vermageren. ‘t Is dorom da m’n gebur van z’n vrouwe most meegoan in d’ Hillig Bloeëdpersessie, bie de Romeinse soldoaten met ‘n harnas van twientig kieloo ip z’n bulte. “Ton go je foeëlen hoevil da je zoe moeten vermageren”, zeej z’n vrouwe.

‘s Anderdaags hee z’ hem meegeslipt no de Triënale en zundag last in Dwars door Brugge. Z’n toenge hangde ip z’n schoeën, toch mocht ie de shuttle nie pakken. “Te voeëte nor huus”, zeej z’n vrouwe.

Van ol da lopen en wangelen wast ie moandagnuchtend nog lam en geus. Je stoend in ‘t gat van z’n vóórdeure lik ‘n bustelstok die gekrakt is. “Zwieg vint, ‘k foeëlen mien lik m’n portemannee,” zeejd ie. Wa wil je domee zeggen, vroege ‘k. “Awal,” antworddet ie, “m’n portemannee is ook ip kommande van m’n vrouwe olsan in bewegiengen. En je vermagert ook.”

Fout opgemerkt of meer nieuws? Meld het hier